Б

Бай бастас, батыр қандас, би құлақтас.
***
Бай бір борандық,
Батыр бір оқтық.
***
Бай бір жұттық,
Батыр бір оқтық.
***
Бай мақтанса, бір жұттық,
Батыр мақтанса, бір оқтық.
***
Бай мен жарлы көмгенде теңелер,
Қорқақ пен батыр өлгенде теңелер.
***
Бай – шешен,
Балуан – албат батыр.
***
Байдан сыралғы, батырдан сауға.
***
Байлық – басқа машақат,
Ашкөздік – жаман әдет, серті қатты,
Өкініш артында оның қайғы жатты.
Бай болу, кедей болу – тағдыр ісі,
Мал іздеу – ерге әшейін машақат-ты.
***
Баймен күреспе,
Батырмен тіреспе.
***
Бақ-бақ еткен текені қар жауғанда көрерсің,
Батырсынған жігітті жау келгенде көрерсің.
***
Бақ-бақ еткен текені қар жауғанда көрерміз,
Батырсынған жігітті жау келгенде көрерміз,
Шешенсінген жігітті дау келгенде көрерміз.
***
Бақ-бақ еткен текені
Қыс түскенде көріңіз.
Батырсынған көкені
Іс түскенде көріңіз.
***
Бақ тайса, батырлық пұшайман жейді.
***
Бақа көлін сүйеді,
Бұлдырық шөлін сүйеді,
Ер жігіт елін сүйеді.
***
Балам өсті дегенше,
Батыр өсті десейші.
Батыр өнер білмесе,
Қапыл өсті десейші.
***
Баланың сегізінде тісі түседі,
Сексенінде ердің елге ісі түседі.
***
Балықшыдан сыралғы,
Батырдан сауға.
***
Бар болсаң, бергеніңді айтпа,
Ер болсаң, жеңгеніңді айтпа.
***
Бар ізгілік түйсіктіге саяды,
Ер біліммен өсіп, атын жаяды.
***
Барақ жүнді батырды
Екі қатынның бірі табады.
Ел билейтін асылды
Мың қатынның бірі табады.
***
Бас пен дене аман болса, тілек кетпейді,
Ер аман болса, тілегіне жетеді.
***
Бас сауғалағаннан батыр шықпас.
***
Басшысын таппаған ел азады,
Жолдасын таппаған ер азады.
***
Басыңа дау келсе, билігің зая,
Үй артына жау келсе, ерлігің зая.
***
Басыңа іс түссе, билігің зая,
Үстіңнен жау түссе, ерлігің зая.
***
Батамен ер көгереді,
Жаңбырмен жер көгереді.
***
Батыл, батылдың ісі мақұл.
***
Батыл болмай, батыр болмайсың.
***
Батыл жігіт жол бастар,
Ақын жігіт той бастар.
***
Батыр алдынан өледі,
Қорқақ артынан өледі.
***
Батыр аңғал, жоқ жомарт.
***
Батыр аңғал келеді.
***
Батыр – аңғал, палуан – дүр.
***
Батыр аңғырт, бай салғырт.
***
Батыр – аңқау, ер – көдек.
***
Батыр аңқау келеді,
Балуан өктем келеді.
***
Батыр болған ханға қас,
Мерген болған аңға қас.
***
Батыр болсаң, жау қайтар.
***
Батыр – бір оқтық,
Бай – бір жұттық.
***
Батыр даңқы – ел даңқы,
Балық даңқы – көл даңқы.
***
Батыр деген – бір-ақ ат,
Би деген – ақ шариғат.
***
Батыр – елдің сәулеті,
Бал құрақ – жердің сәулеті.
***
Батыр елшіл, тұлпар жершіл.
***
Батыр емей немене атқан жігіт,
Қатын емей немене қашқан жігіт.
Мың жылқылы байыңды елер ме екен
Оразасын үйінен ашқан жігіт.
***
Батыр жайшылықта бір адам,
Жауға кірсе, мың адам.
***
Батыр жарқырап жүреді,
Қорқақ қалтырап жүреді.
***
Батыр – жау барда сыйлы,
Би – дау барда сыйлы.
***
Батыр – жауда,
Сабыр – дауда.
***
Батыр жауда көрінеді,
Данышпан дауда көрінеді.
***
Батыр жауда сыналады,
Жуас жайда сыналады.
***
Батыр жаусыз болмас.
***
Батыр жаусырамаса, батыр бола ма!
***
Батыр жігіт – жау көркі,
Шешен жігіт – дау көркі.
***
Батыр кісі әр қатыннан туады,
Әділ кісі бір қатыннан туады.
***
Батыр қол бастайды,
Шешен сөз бастайды.
***
Батыр қол бастайды,
Шешен тар жерде сөз бастайды.
***
Батыр майданда мықты,
Жаман үйде мықты.
***
Батыр мақтанса, бір оқтық,
Бай мақтанса, бір жұрттық.
***
Батыр мақтанса, жауға шапқанын айтар.
Қу мақтанса, алдап соққанын айтар.
***
Батыр мың қол бастайды,
Шешен тар жерде сөз бастайды.
***
Батыр ортақ, бай ортақ,
Төресі әділ хан ортақ.
Қараңғы үйдің ішінде
Шалқымай жанған шам ортақ.
***
Батыр – ортақ, бақ – жалқы.
***
Батыр – өктем, балуан – алып,
Әйел – дария, ер – балық.
***
Батыр өлерін білмейді,
Сыншы берерін білмейді.
***
Батыр өлімі маржадан.
***
Батыр тапса, барша жер,
Бақыл тапса, басып жер.
***
Батыр туса, ел ырысы,
Жаңбыр жауса, жер ырысы.
***
Батыр түбі бақсы болар.
***
Батыр түсінде жау көреді,
Балықшы түсінде ау көреді.
***
Батыр ұлды жауыр етпе,
Жүйрік арқасын жара етпе.
***
Батырға да жан керек.
***
Батырға да жан керек,
Пақырға да жан керек.
***
Батырға жара да жарасады.
***
Батырға оқ дарымайды,
Батырға жау жоламайды.
***
Батырға таяқ та жарақ.
***
Батырдан да жолды игі.
***
Батырдан кеңес сұрасаң,
Қылыш, мылтық, байрағын айтар.
Шаруадан кеңес сұрасаң,
Соқасы мен тайлағын айтар.
Қасаптан кеңес сұрасаң,
Пышағы мен қайрағын айтар.
***
Батырдан оқ та қорқады.
***
Батырдан сауға,
Бәйгеден олжа.
***
Батырдан хат – достарға қуат.
***
Батырды бәрекелді өлтіреді.
***
Батырды жауда,
Данышпанды ашуланғанда,
Досты жоқтықта сына.
***
Батырды жеңуге болады,
Қатынды жеңуге болмайды.
***
Батырды намыс өлтірер,
Қоянды қамыс өлтірер.
***
Батырдың ажалы атынан,
Ақынның ажалы қатыннан.
***
Батырдың атын жау шығарады,
Шешеннің атын дау шығарады.
***
Батырдың барғанынан қайтқаны тез.
***
Батырдың басы екеу болмайды.
***
Батырдың бір есімі – тентек.
***
Батырдың бір ісі тентек,
Қорқақтың екі ісі тентек.
***
Батырдың жолы игі.
***
Батырдың көзі өмірде,
Қорқақтың көзі өлімде.
***
Батырдың көркі – ту.
***
Батырдың күші майданда көрінер,
Келіншектің себі жайғанда көрінер.
***
Батырдың сөзі мың теңгелік.
***
Батырлығың не керек,
Байсалдылық болмаса.
Ақындығың не керек,
Айтарлығың болмаса.
***
Батырлық жолдасқа пайда, жанға қас,
Мырзалық қонаққа пайда, малға қас,
Өткір сөз дауға пайда, ауруға қас.
***
Батырлық майданда,
Ақылдылық ашу үстінде сыналар.
***
Батырмен сөйлессең,
Жау ойнағын айтады.
Шаштаразбен сөйлессең,
Ұстара мен қайрағын айтады.
***
Батырсынған жігітті
Жау келгенде көрерміз.
***
Батырсынған жігітті жау келгенде көрерміз,
Шешенсіген жігітті топ ішінде көрерміз.
***
Баулыған батыр болады.
***
Баулыған батыр болар,
Үйретінді шешен болар.
***
Бәйгеге қосар атыңның
Ерін алма, терін ал.
Күреске түсер батырдың
Көңілін жайла, шерін ал.
***
Белдеуге бедеу байланса,
Ердің үйде болғаны.
***
Берген ердің аты шығады,
Аты шыққан мәңгі жасайды.
***
Боларында болып өт,
Боз жорға аттай желіп өт.
Болмасыңды білген соң,
Болған ердің қосын жек.
***
Боларыңда болып өт,
Боз жорғадай желіп өт.
Боларыңды білмесең,
Болған ердің қосын жек.
***
Боларыңды біліп өт,
Бозжорғадай желіп өт.
Боларыңды білмесең,
Болмасыңды білген соң,
Болған ердің қосын жек.
***
Болат бүгілмес, ер мойымас.
***
Болат қайнауда шынығады,
Батыр майданда шынығады.
***
Болатын елдің баласы,
Бірін-бірі «батыр» дейді.
Болмайтын елдің баласы,
Бірін-бірі «қатын» дейді.
***
Болмасыңды білген соң,
Болған ердің қосын жек.
Өзің адам болған соң,
Аударып тастап атпен кет.
***
Бөрі азығы мен ер азығы жолында.
***
Бытырасаң басына,
Батыр келер қасына.
***
Білген ерден білім толтыр бойыңа,
Ізгі сөзден ес кіреді ойыңа.
***
Білген ұрыны пақыр дейді,
Білмеген ұрыны батыр дейді.
***
Білмегендер ұрыны батыр дейді,
Білгендер ұрыны пақыр дейді.
***
Білім – ердің дәулеті.
***
Білім қадірін ер білсе,
Ер қадірін ел біледі.
***
Білімсіз туған көп ұлдан,
Білімді туған қыз артық.
Білімсіз көп наданнан,
Білімді бір ер жүз артық.
***
Бір батырға мың қорқақ шақ келмейді.
***
Бір ердің дәулетіне қырық адам мас болады.
***
Бір осалдық болады екен әр ерде,
Бірер айып болады екен өнерде.
Басын алса соның үшін адамның,
Ешкім тірі қалмас еді о жерде.
***
Біткен істің міні жоқ,
Бітірген ердің кемі жоқ.

maqal-matel.kz