Баға білмеген мал әлек,
Бағымы кеткен ел әлек.
***
Бағбан еңбектің қиыншылығын көрмесе,
Жұрт жемістің дәмін татпас еді.
***
Байды Құдай атайын десе,
Байталын атқа сатады.
Жақсыны Құдай атайын десе,
Өз елін жатқа сатады.
***
Байлығы тайған бек
Жұртсыз күн көре алмайды.
***
Бақа көлін сүйеді,
Бұлдырық шөлін сүйеді,
Ер жігіт елін сүйеді.
***
Бақа көлінде патша,
Балық суында патша,
Жігіт елінде патша.
***
Балаңа байқап сөйлесең, ақылыңа көнер,
Байқамай көп сөйлеген, жұрт ішінде өлер.
***
Балалы үйрек көлден кетпес,
Баласы жас елден кетпес.
***
«Балам» деген жұрт болмаса,
«Жұртым» дейтін бала қайдан шықсын.
***
Баланы жеріне бер,
Жер ыңғайы келмесе, еріне бер.
***
Баланың сегізінде тісі түседі,
Сексенінде ердің елге ісі түседі.
***
Балаңды жұрт мақтаса,
Бәрінен де сол сүйгі.
***
Бар елің базар, жоқты қайдан қазар.
***
Барақ жүнді батырды
Екі қатынның бірі табады.
Ел билейтін асылды
Мың қатынның бірі табады.
***
Барлық қазақтың салты бір,
Табиғаты бөлек.
***
Басқа елде хан болғанша,
Өз еліңде құл бол.
***
Бассыз – ел жетім.
Балықсыз – көл жетім.
***
Бастығы парақор болса,
Бағынған елі пәлеқор болады.
***
Басшы халқымен ұлық.
***
Басшысыз жұрт болмайды,
Қолбасшысыз әскер болмайды.
***
Басшысын таппаған ел азады,
Жолдасын таппаған ер азады.
***
Басыңа бақ қонғанда,
Елден асқан данасың.
Басыңнан бақ тайғанда,
Қалыбыңа барасың.
***
Басыңа бақ қонғанда,
елден асқан данасың,
басыңнан бақ тайғанда,
қалыбыңа барарсың.
***
Батыр даңқы – ел даңқы,
Балық даңқы – көл даңқы.
***
Батыр – елдің сәулеті,
Бал құрақ – жердің сәулеті.
***
Батыр елшіл, тұлпар жершіл.
***
Батырсынған жігітті жау келгенде көрерміз,
Шешенсіген жігітті топ ішінде көрерміз.
***
Бәйтерек басын күн шалса,
Көлеңкесі жердікі.
Артық туған ақылды
Өмір бойы елдікі.
***
Беде ексең, мал семіз,
Егін ексең, ел семіз.
***
Бейбітшілік – өмір тынысы,
Байлық – ел ырысы.
***
Бек өсер жай халықтың арқасында,
Тізгінді үзеңгімен тартсаң да!
***
Бек тәтті өмірді сүйсе,
Елдің күні қараңғы.
***
Берекелі болса ел – жағасы жайлау ол бір көл,
Берекесі кеткен ел – суы ашыған бетпақ көл.
***
Берекелі бұлақтың –
Басы иілген талы болады.
Берекелі халықтың –
Белі иілген шалы болады.
***
Берекелі елдің баласы –
Бірі қанат, бірі құйрық,
Берекесіз елдің баласы –
Бірі аманат, бірі күйік.
***
Бетегелі жерге мал тоқтайды,
Берекелі елге бақ тоқтайды.
***
Бетсіз болсаң, белгісіз боларсың,
Белгісіз болсаң, елсіз қаларсың.
***
Би болмаған би болса,
Билемеген ел қоймас.
Тобыршықтан би қойсаң,
Бақайшықта май қоймас.
***
Бидің айтқан сөзінің бәрі кеңес,
Кісі ақылы кісіге ақыл емес.
Түнде ұры халықтың малын жесе,
Ертең жиын-тойға тіпті кірмес.
***
Бисіз ел – белдеусіз үй.
***
Биі әділ болса, елінде бір дау болмас,
Жаман биге барған адам сау болмас.
***
Биікпін деп созба мойын,
Биік атақ емес мойын.
Жұртыңнан асып жатса ойың,
Сен шығатын дөңес дайын.
***
Бозбаланың бастаған елі оңбайды,
Құралай бастаған киік оңбайды.
***
Бойдақ жігіт жұрт күйеуі.
***
Болатын елдің баласы,
Бірін-бірі «батыр» дейді.
Болмайтын елдің баласы,
Бірін-бірі «қатын» дейді.
***
Болымдының баласы
Он бесінде баспын дейді.
Болымсыз елдің баласы
Отызында жаспын дейді.
***
Бөтен елге патша болғанша,
Өз еліңде шопан бол.
***
Бөтен елде би болғанша,
Өз еліңде шопан бол.
***
Бұ қу тамақ талай елге апат боп,
Жер қойнына кірген олар опат боп.
***
Бұлбұл гүлінде сайрайды,
Адал басшы ел-жұртын ойлайды.
***
Бұлт шығып, жаңбыр жаумай елді алдайды,
Әйелдің ғайлакері ерді алдайды.
***
Бұрын айтылмаған білімді
Жұрт сөзіңнен таниды.
***
Бұтты былғаған жұртты былғайды.
***
Бүлінген елден бүлдіргі алма.
***
Біздің елде боқ жейтін қарғалар
Бөтен елге келіп жыл құсы бола қалыпты.
***
Білек түр де еңбек ет,
Етек түр де елге жет.
***
Білмес наданнан би қойсаң,
Жұртыңды дауға алдырар.
***
Білсең, халықтан озасың,
Білмеген жамандар, мойның неге созасың.
***
Білікті адам жұрт тынғанда сөйлейді.
***
Білім ел ішінде.
***
Білім қадірін ер білсе,
Ер қадірін ел біледі.
***
Білімді жігіт еліне – ашылып есік, иіліп бесік болар.
***
Білімділер халыққа бас, ес еді,
Білімсіздер қылышпен іс шешеді.
***
Білімдімен дос болсаң,
Сасқанда ақылын айтар,
Білімсізбен дос болсаң,
Топ ішінде бетің қайтар.
***
Бір ауыз өсек ел өртейді,
Бір шағым қу жер өртейді.
***
Бір ел өңкей жақсы болмас,
Жыны жоқ адам бақсы болмас.
***
Бір жақсы халыққа тұлға,
Мың жаман тұрмайды пұлға.
***
Бір қарын майды бір құмалақ шірітеді,
Бір бөлек елді бір жаман ірітеді.
***
Бір іс қылса, ақысын бер тіленбей:
Ішкіз, жегіз, үлестіріп шүлендей.
Ел ішінде сәл нәрседен пышырап,
Атың жүрер жаман сөзге ұшырап.
***
Бірді сепсең, жерге,
Мыңды берер, елге.
***
Біреуге елден береді,
Біреуге жерден береді.
***
Бірліктен ел құралар.
***
Бірлікті ел бұзылмас.
***
Бірінші би – халық,
Екінші би – тарих.
***
Бітуі жаман қамысты
Су ішінде өрт алар.
Жүрісі жаман адамды
Ел ішінде жау алар.
maqal-matel.kz