Бағынбаған патшаның басы кетеді.
***
Бай болдым деп шашпа,
Патша болдым деп аспа.
***
Бай қасына барып көр,
Пақыр болмасаң, маған кел.
Хан қасына барып көр,
Басың кетпесе, маған кел.
***
Байға жалыншақ болма,
Ханға табыншақ болма.
***
Бақа көлінде патша,
Балық суында патша,
Жігіт елінде патша.
***
Бақпен асқан хандардан,
Баспен асқан қара артық.
Сақалын сатқан кәріден,
Еңбегін сатқан бала артық.
***
Бақыр қазан қайнаса —
Бәріміздің бағымыз.
Туған жердің әр тасы
Біздің алтын тағымыз.
***
Бала – ханнан үлкен,
Ашамай – нардан үлкен.
***
Балалық шағы – патшаның тағы.
***
Баласы жоқ ханым – тұл,
Баяны жоқ ғалым – тұл.
***
Барма ханға, өзі келер малға,
Барма биге, өзі келер дауға.
***
Барма ханға,
Өзі келер малға.
Барма биге,
Өзі келер үйге.
***
Басқа елде хан болғанша,
Өз еліңде құл бол.
***
Басына бәле тілеген адам
Сұлтанның сөзін қайырар.
***
Басыңа пәле келсе,
Таққа сиынба, Хаққа сиын.
***
Батыр болған ханға қас,
Мерген болған аңға қас.
***
Батыр болып, бай болсаң,
Патшадан нең кем?
Жарлы болып, бек болсаң,
Келекеден нең кем?
***
Батыр ортақ, бай ортақ,
Төресі әділ хан ортақ.
Қараңғы үйдің ішінде
Шалқымай жанған шам ортақ.
***
Берсін дейді сұлтан,
Бергізбейді сұбхан.
***
Би баласы биге ұқсар,
Биік-биік тауға ұқсар.
Хан баласы ханға ұқсар,
Қанатын жайған қазға ұқсар.
Бай баласы байға ұқсар,
Байланбаған тайға ұқсар.
***
Бөтен елге патша болғанша,
Өз еліңде шопан бол.
***
Бұрынғы ханның билігі жүрмес,
Кейінгі ханның ақылы жүрмес.
***
Бір жақсыңды төреден аяма,
Арқаңды іргесіне таяма.
***
Бір қылық хан қызында да болады.
maqal-matel.kz