Абысын тату болса, ас көп,
Ағайын тату болса, ат көп.
Абысын тату болса, ас көп болар,
Ағайын тату болса, ат көп болар.
Абысын тату болса, шыж-мыж көбейеді,
Ағайын тату болса, сіз-біз көбейеді.
Ағайын ала болса,
Ауыздағысынан айрылар.
Ағайын аразынан ақсайды,
Ат тұрасынан ақсайды.
Ағайын бар болса, көре алмайды,
Жоқ болса, асырай алмайды.
Ағайын бар болсаң, көре алмайды,
Жоқ болсаң, бөліп бере алмайды.
Ағайын мен жекжат арасын,
Майына мінген аты айырады,
Немесе оқымаған бата айырады.
Ағайын тату болса, ат көп,
Абысын тату болса, ас көп.
Ағайын, туған кімде жоқ,
Сыйласпаса, жат жуық.
Ағайынды ажын ажыратар,
Ақ жүзіңді әжім ажыратар.
Ағайынның азары болса да, безері болмайды.
Ағайынның азары көп болса да,
Безері болмас.
Ағайынның аразы ауыздың сасығыменен бірдей.
Ағайынның аразы болса да, безері болмайды.
Ағайынның өкпесі айтуменен кетеді,
Дұшманның өкпесі кек алумен бітеді.
Адам ұйымшыл, мал үйіршіл.
Адасқан қазды жиылған қарға жейді.
Ажыраған бірін-бірі іздейді.
Айрылған азады, косылған озады.
Айрылған аюға жем,
Бөлінген бөріге жем.
Айрылғанды атты мен жаяу да ұрады,
Қосылғанға қол қусырып тұрады.
Айрылғанның азары шын,
Қосылғанның озары шын.
Айыратын жаман бар,
Қосатұғын жаран бар.
Айырылар дос ердің артқы қасын сұрайды.
Айырылар тамыр ердің артқы қасын сұрайды.
Айырылған азады,
Қосылған озады.
Айырылғанды аю асайды,
Бөлінгенді бөрі асайды.
Айырылма, жұртым, үйіріңнен,
Айырылсаң үйіріңнен,
Екі қолың кетпес бүйіріңнен.
Ақылдасқан азбас,
Жақындасқан тозбас.
Ақылды адам елдің бейбітшілігін тілер.
Ала ауыз болса ауылың,
Жау шабуылын баса алмас.
Ала болған алты кісіні
Ынтымақты болған екі кісі алады.
Ала болған елді дұшман аралар,
Туысқаның жаман болса, басын қаралар.
Ала болған елді дұшпан аралар.
Ала болсаң, азасың,
Ынтымақты болсаң, озасың.
Алтау ала болса, ауыздағы кетеді,
Төртеу түгел болса, төбедегі келеді.
Алтау ала болса,
Ауыздағы кетеді,
Төртеу түгел болса,
Түстік жерден түсім түседі.
Алшаңдап басар ат аз ба,
Аяңы жорғаға бергісіз.
Көкірегі сара қарт аз ба,
Білімі молдаға бергісіз.
Құт-берекелі үй аз ба,
Хан ордасына бергісіз.
Аңдысқан ауыл болмас,
Ерегескен ел болмас.
Арамдық кірген үйден тыныштық қашады.
Арамза туған мал өспес,
Араздық қылған ел өспес.
Арашаға бой бермеген
Арашаға зар болар.
Арашашы болсаң, алты таяққа шыда.
Арғымақтың зықын
Бүгелек шығарады.
Азаматтың зықын
Сүмелек шығарады.
Артқы айылым берік болса,
Атым тулап нетерсің.
Ағайында бірлік болса,
Жатым маған нетерсің.
Ас жүрген жер – береке,
Жас жүрген жер – мереке.
Асу-асу белдер бар,
аса алмай жаудың аты өлсін,
ағайынмен тату бол,
айыра алмай жат өлсін.
Ата-анаңды сыйласаң, көп жасарсың,
сыйламасаң жан қинарсың.
Ата сыйласаң алдыңа келер.
Атқа мінгеспе,
Мінгессең, үндеспе!
Аузың бір болса, аспандағыны аласың,
Аузың ала болса, алақандағыны алдырасың.
Ауызбірліктің алды – ас.
Ауыл ала болса, ауыздағы кетеді,
Ынтымаққа Қырымдағы жетеді.
Ауыл болсаң – қауым бол.
Ауыл иті ала болса да,
Бөрі келгенде бірігеді.
Ауыл иті ала болса да,
Бөрі көргенде бірігеді.
Ауыл иті бөріні көрсе, жарасар.
Ауыл итінің аузы ала болса да,
Бөрі көргенде бірігеді.
Ауылға айтсаң, асар,
Көршіге айтсаң, қосар.
Ауылы бүтінді аман де,
Елі бүтінді есен де.
Ауылы бірдің – ауызы бір.
Ауылың ынтымақты болса,
Суалмас көлдейсің.
Ауылың ынтымақсыз болса,
Су бармас шөлдейсің.
Ашу ажыратады,
Ақыл жадыратады.
Ашу – шабыстырады,
Ақыл – табыстырады.
maqal-matel.kz