Адам өз атын кісілікпен көтереді.
***
Адам өміріндегі аяулы жемісі – абыройлы аты.
***
Адамгершілік абырой алып береді.
***
Адамгершілік опалыққа тұрақтайды.
***
Адамгершілікке арналған
Үш сауап бар,
Шөлге құдық қазған,
Өзенге көпір салған,
Жолға ағаш еккен.
***
Адамды тарлық
Шынықтырады.
Адамгершілікті барлық
Ұмыттырады.
***
Амандық ағадан.
***
Адамдық адалдықта,
Адалдық шындықта.
***
Адамдық түбі реніш,
адалдық түбі кеніш.
***
Адамдықтан үлкен ат жоқ,
Наннан үлкен ас жоқ
***
Адамдықтың белгісі – иіліп сәлем бергені.
Шын достықтың белгісі – көп кешікпей келгені.
***
Адамдықтың белгісі –
Иіліп сәлем бергенің.
Шын достықтың белгісі –
Шынайы көмек бергенің.
***
Адамның баласы асатпай жемейді,
Көргенсіздің баласы көріп отырса да,
«мә» демейді.
***
Адамның ұяты бетінде,
Адамгершілігі ниетінде.
***
Адамшылықтың жоғарғы сатысы – арын сақтау.
***
Азаматтық жасай алмаған адам –
Бұл өмірге келмеген адаммен бірдей.
***
Айдалада қалғанға да қайырым етеді.
***
Айтар сөзін білмесе,
Адамдықтан не пайда?
Артқан жүгін тартпаса,
Атандықтан не пайда?
Ұрлық қылып, мал берсе,
Адалдықтан не пайда?
***
Айтқызып істеген адамда қасиет жоқ.
***
Ақылды кісіден кісілік үйренесің.
***
Ақын болу өз еркің,
Азамат болу борышың.
***
Алдыңа келсе, атаңның құнын кеш.
***
Алыссаң, атаң да болса жық,
Аясаң, көтеріп жібер.
***
Анасын сүйгеннің баласын сүй.
***
Аралас жүр, ішінде бол ізгінің,
Сонда ұстайсың кісіліктің тізгінін.
Сырттап жүрсең, сол әбестік болады,
Нұрлы жүзің өкінішпен солады.
***
Арамды Құдай табады,
Момынды қайыр табады.
***
Арлы адамның белгісі шындыққа жығылады,
Арсыз адамның белгісі құр күлкіге ұрынады.
***
Арлы арына қараса, арсыз «жеңдім» дейді.
***
Артық болам деп, тантық болма.
***
«Арық» деген жаман тай
Жазға шықса ат болар,
Жамандығың сезілсе
Жақын кісің жат болар.
***
Асыл адамға өлім жоқ.
***
Асыл міндет – адалдық,
Асыл қасиет – адамдық.
***
Аяулы ғой кісіде тек кісілік,
Инабаты, қасиеті кішілік.
maqal-matel.kz