Айбынды салтын ел бұзбас,
Адамдық антын ер бұзбас.
***
Адал болсаң, ант ішпе!
***
Адам адамға – аманат,
Дидар көрісу – ғанибет.
***
Адам уағдада тұрса, сөз қадірін білгені,
Уағдада тұрмаса, ол адамның өлгені.
***
Адамзат бөз бермейді, сөз береді.
***
Айбынды салтын ел бұзбас,
Адамдық антын ер бұзбас.
***
Айтқан сөз атылған оқпен тең.
***
Айтсаң, сөзіңде тұр.
***
Айтсаң, сөзіңе жет,
Мінгес те, үйіңе жет.
***
Айтсаң, уәдеге жет,
Уәдесіз Аллаға шет.
***
Ақ болсаң, ант ішпе,
Айрандай жұғады бойыңа.
***
Ақ та болса, ант ішпе,
Айрандай жұғар.
***
Ақиқат сөзге анттың керегі жоқ.
***
Ақшадан уәде күшті.
***
Аманат жұмыс әлекке салады.
***
Аманат, аманатқа етпе қиянат.
***
Анаң үшін аянба, ант ұрады.
***
Ант – аумай, ат жүгірмейді.
***
Ант бұзған оңбайды,
Салт бұзған сорлайды.
***
Ант қылыштан да өткір,
Сөз қояннан да жүйрік.
***
Ант-уәде жоқ кәпірден.
***
Ант ұрғанға жолама,
Залалы тимей қала ма.
***
Ант ұрғанның ер-тұрманы оңбас.
***
Ант ұрмай ат сүрінбес.
***
Ант ішкенге сенбесең,
Қан ішкенге жолығарсың.
***
Ант ішкеннің мыңы өледі,
У ішкеннің бірі өледі.
***
Ант ішкеннің үйіне барма,
Айрандай жұғады.
***
Арамдық
Адамның ажарын бұзады.
Ант ұрған
Халықтың базарын бұзады.
***
Арсыздың сөзінде тұрақ жоқ,
Көзі бар да, құлақ жоқ.
***
Асқа талау түссе, ант ұрғанның мұратын береді.
***
Ата ұлы аталықтың сөзін айтар,
Асылсыз жолдас болса, кері қайтар.
Қасыңа жолдас болып ере қалса,
Дұспанға құпиялап сырыңды айтар.
***
Аузында сөз тұрмастың
Бір жерде өзі тұрмас.
***
Ашу үстінде ант жүрмейді.
***
Ашу үстіне ант жүрмейді,
Пышақ үстіне қылыш жүрмейді.
***
Ашушаңның анты болмайды,
Сабырсызға дәулет қонбайды.
maqal-matel.kz