Ағаштан оқтық та, боқтық та шығады.
***
Адам бір оқтық.
***
Адам бір оқтық, өлтіру оңай,
Бірақ мың адам бір адамды тірілте алмайды.
***
Азы қарулы,
Сый сатулы.
***
Ажал жетпесе, оқ жетпейді.
***
Ажалдыға ағаш – оқ.
***
Айдалаға атқан оқ
Ажалдыға тиеді.
***
Айдалада атқан оқ,
Ажалдыға тиеді.
***
Айтқан сөз – атқан оқ.
***
Айтқан сөз, атқан оқ – қайтпайды.
***
Айтқан сөз атылған оқпен тең.
***
Айтқан сөзің – атқан оқ,
Нысанаңды абайла.
***
Айтқыштың сөзі – атқыштың оғы.
***
Айтылған сөз – атылған оқ.
***
Ақ білектің күшімен,
Ақ найзаның ұшымен.
***
Ақ жүзің де айнадай, перде болса,
Құл құтырар, төсегін төрге салса.
Жігітім кедей болса, сөз айта алмас,
Қылышынан қан тамған ер де болса.
***
Ақ кіреуке сауыттың
Жағасы болады, жеңі болмайды.
***
Ақ сауыттың жағасы бар, жеңі жоқ,
Шын жақсының ашуы бар, кегі жоқ.
***
Аққу құсқа оқ тисе,
Қанатын суға тидірмес.
Ер жігітке оқ тисе,
Қиналғанын білдірмес.
***
Ақыл таппайтын амал жоқ,
атқыш бұзбайтын қамал жоқ.
***
Ақымаққа айтқан сөз
Далаға атқан оқпен тең.
***
Ақымақтың атқан оғы ауға тимейді, тауға тиеді.
***
Ақымақтың оғы аңға тимейді, тауға тиеді.
***
Ақынның тілі қылыштан өткір.
***
Ақынның тілі қылыштан өткір,
Қылдан нәзік.
***
Алмас қылыш майданда серік,
Асыл сөз майданда да, сайранда да серік.
***
Алмасың болса – мойным бар,
Асылың болса – қойным бар.
***
Алтын жығаң болса да,
Жаға менен жең керек.
***
Алтын кемер белге сән,
Алтын қылыш ерге сән.
***
Алыстан атқан ағаш оқ ажалдыға тиеді.
***
Ана қарғысы – боқ,
Ата қарғысы – оқ.
***
Ананың сүйген жері,
Отқа күймейді,
Оқ та тимейді.
***
Ант қылыштан да өткір,
Сөз қояннан да жүйрік.
***
Аң таппаған атынан көреді,
Ата алмаған оғынан көреді.
***
Аң таппаған атынан көреді,
Ата алмаған мылтығынан көреді.
***
Арғымақ атқа оқ тисе,
Жабыдай болып туламас.
Ер жігітке оқ тисе,
Жамандай болып шуламас.
***
Арғымақ мойнын оқ тесер,
Азамат мойнын жоқ кесер.
***
Арғымаққа оқ тисе,
Мәстектей туламас.
Сыпайыға оқ тисе,
Жамандай шуламас.
***
Арғымаққа оқ түссе,
Мәстектей туламас.
Сыпайыға оқ түссе,
Жамандай шуламас.
***
Арыстанның белгісі –
артына қайырылып ақырмайды,
қас батырдың белгісі –
қос өкпеден оқ тисе,
дұшпанына сыр беріп бақырмайды.
***
Асқар тауға жарасар, басындағы обасы,
айдын көлге жарасар, сылдырлаған қоғасы,
ер жігітке жарасар, қолындағы найзасы.
***
Аспанға қарай оқ атпа,
Өзіңнің түсер басыңа.
***
Аспаннан былғары жауса да,
Құлға оқшантай тимейді.
***
Асыл қанжар қын түбінде жатпайды.
***
Ата алмағанның оғы алты құлаш.
***
Ата көрген оқ жонар,
Ана көрген тон пішер.
***
Ата көрген оқ жонады,
Ене көрген тон пішеді.
***
Атадан ұл туса игі,
Ата жолын қуса игі,
Беліне садақ буса игі.
Бетіне келер ұятын
Өзі біліп жуса игі.
Өзі біліп жумаса,
Бәрінен де жоғы игі.
***
Атасы мылтық атқанның баласы оқ жонар.
***
Атасы мылтық атқан оқ жонады.
***
Атқан жерде оқ қалады,
Тышқан жерде боқ қалады.
***
Атылған оқ қайтып оралмайды.
***
Аузында әзілі жоқтың
Қолында шоқпары бар.
***
Аузында әзілі жоқтың
Қолында қолшоқпары бар.
***
Ауруға жеңілсең де,
Қаруға жеңілме.
***
Ашу – пышақ,
Ақыл – таяқ.
***
Ашу – садақ,
Ақыл – таяқ.
***
Ашу үстіне ант жүрмейді,
Пышақ үстіне қылыш жүрмейді.
maqal-matel.kz